政情：馮偉華畀大舊窒秀才遇着兵
教協副會長馮偉華被視為會長張文光嘅接班人，自從做咗終極普選聯盟發言人之後曝光率激增，尋日佢又接受網上電台訪問，同參與五區「公投」嘅社民連辭職立法會議員陳偉業對談。書生型嘅馮偉華對住聲大夾惡嘅大舊，好快就招架不住，真係秀才遇着兵，有理說不清。
普選聯主張以談判推動普選，鼓吹五區「公投」嘅大舊就連珠炮發，不斷質疑談判嘅成效，反問如果傾唔掂，普選聯會點做呢？之後又針對教協嘅立場有無受到動搖，仲揶揄教協一代不如一代。
兩主持人同夾攻
面對大舊一輪攻勢，馮偉華都嘗試去力挽狂瀾，強調自己「唔係新仔」之餘，仲話佢「唔係咁天真㗎」，然後又試圖數番普選聯嘅原則同埋立場出嚟。
不過教師出身嘅馮偉華實在太過溫文爾雅，好多時都唔夠大舊大聲，加上兩名節目主持人嘅夾攻，馮偉華就敵唔過三把口，好多時處於捱打狀態。聞說馮偉華後年好可能會接張文光嘅棒參加立法會選舉，佢真係要好好把握時間，磨利啲把嘴呀。