中環耳目：陳健波上海總會飽口福
好多人都知保險界立法會議員陳健波以前係「孱仔」一名，久咳兼有高血壓，後來因為勤跑步，身體至回復健康，所以依家佢好着重健康，食嘢當然係好重要嘅一環。原來飲食要健康，唔一定清淡無味，健波鍾意幫襯中環嘅上海總會，就係貪佢嘅出品好味又有益。
喺上海總會，佢推介清蒸河鰻、蘿蔔鯽魚湯同南瓜八寶飯。其中河鰻去咗骨用金華火腿加冬菇清蒸，魚肉綿滑細嫩，價錢又唔算貴，半份有幾斤重，賣二百八十蚊，不過健波話想食呢個餸要預先訂菜。
而蘿蔔鯽魚湯就夠晒清甜，健波話應酬多，飲碗蘿蔔湯夠晒消滯。甜品南瓜八寶飯材料夠晒多，有齊紫米、豆蓉、蓮子、紅棗等，食前仲要淋桂花糖漿，但係食落口唔算過甜。
卓妮