政府忠告市民，吸煙危害健康，功夫茶細細個就聽過咁嘅宣傳。光陰似箭，日月如梭，不經不覺香港已經進入無煙新世代，總之有瓦遮頭就唔准吞雲吐霧，對於非煙民嚟講都算係一件好事。當然啦，家陣路邊空氣質素愈來愈差，因為煙民個個走晒落街食煙吖嘛。
有一個問題功夫茶始終諗來諗去都諗唔通，既然食煙害處咁多，簡直係害人害己害地球，點解政府唔索性將香煙等同毒品，一刀切唔准買又唔准食？你呢頭話要禁煙，嗰頭又任人買煙，好矛盾啫。嗱嗱嗱，你唔好話政府唔捨得放棄收入豐厚嘅煙草稅呀，正人君子唔做得咁偽善o架！
任人買煙仲有一樣嘢非常之咁唔要得，就係十八歲樓下未成年人士輕而易舉買到香煙。大部分零售商不聞不問，認錢唔認人，即使學生哥着住校服，香煙照賣可也。
防止青少年吸煙委員會做過一項調查，發現七成三零售商違法向十八歲以下人士賣煙。零售商之中，食肆嘅違法比率最高，竟然達到九成；其次係士多同辦館有八成七；油站同報攤係八成三；超級市場佔七成。
調查又顯示，七成七零售商違法賣煙畀着便服嘅青少年，着住校服又點呢？都有五成二零售商照賣。另外，六成六零售商未有依法展示「禁止向十八歲以下人士售賣煙草產品」嘅標誌。
講真，在商言商其實又無可厚非喎，對於普通零售商嚟講，做生意搵餐晏，理得顧客夠秤未夠秤吖，買煙賣煙你情我願，除非失驚無神跳個差人叔叔出嚟又話拉又話鎖嘅啫。既然特區政府係有姿勢冇實際嘅紙老虎，執法者隻眼開隻眼閉咯喎，傻仔先至唔會賣煙畀小朋友，嫌錢腥咩！
防止青少年吸煙委員會行政總監李昌隆又提到，中國於○五年成為世界衞生組織嘅《煙草控制框架公約》簽約國之一，香港亦必須履行發展及推動控煙工作，而《公約》訂明禁止由未成年人士售賣煙草產品，但係香港冇相關法例要求煙草售賣員必須年滿十八歲，明顯存在漏洞，違反國際公約。
唉，聽落都幾悲哀，未夠秤又可以買煙，未成年又可以賣煙，煙禍荼毒青少年呀！
講到尾，香港嘅所謂控煙政策都係崇尚空談㗎嘞，你試下去卡拉ＯＫ吖，明明話禁止吸煙，之但係一閂埋門根本冇人理你。你又試下入夜之後去茶餐廳吖，莫講話紋身大漢公然吸煙，即使係少年十五二十時嘅後生仔女，一樣百無禁忌猛咁煲煙。
計功夫茶話齋，最徹底莫過於真係將香煙刑事化，吸煙一旦等同吸毒，煙民肯定大減九成，咁先至係如假包換嘅無煙新世代吖嘛。