政情：ＬＣ１換新裝混能車
立法會主席座駕「ＬＣ１」換新車一波三折，原本計劃喺前年更換Volkswagen（福士）嘅「Phaeton」（輝騰）三點二公升豪華房車，但發現有高官使用嘅同款座駕出現頻頻壞車情況，所以物流署建議再觀察半年先至扑錘，點知拖到最近，物流署忽然決定改買六十多萬元嘅日本凌志GS450h油電混燃嘅豪華跑房車，直到尋日終於喺立法會停車場首次曝光。
講開環保混燃車，早在○八年已購買豐田第二代Prius嘅立法會議員馮檢基好關注近期豐田部分車種因設計失誤引起駕駛安全問題，明日會喺立法會提出書面質詢。當初豐田借咗部Prius畀阿基揸咗兩星期，佢揸得好過癮，於是豐田將部車當二手車平五萬元賣畀佢，點知後來政府宣布豁免環保私家車首次登記稅，眼白白錯失優惠，總之就係貪字得個貧。