政情：梁振英：遇到掟鞋會接住
高鐵撥款一役後，港府同班年輕人好似企喺對立面咁，前排仲有青年向署理特首唐英年掟鞋洩憤，擺明落佢面。與唐唐同為下屆特首熱門候選人嘅行會召集人梁振英（CY），尋日出席港台錄影節目同青年對話時，唔知係咪得一個人咁多，結果冇畀人掟鞋，仲講笑話如果畀人掟鞋，會一手接住喎。
CY尋日同一個「八十後」青年、Roundtable總幹事林輝對話時，盛讚香港年輕人語言能力高，比內地青年有優勢。面對青年人上位難，CY寄語佢哋要放眼國際，唔好局限自己喺香港呢個彈丸之地；又教佢哋要學識走位，先可以發圍，仲話「一道門閂咗，總有第二道門開畀你哋」，佢語重心長，擺到明想同班「八十後」企喺同一陣線。
青年買樓難已成為社會矛盾，被視為當年「八萬五」政策元兇嘅CY，一直係眾矢之的。面對今日青年住屋問題，CY話呢個結，港府、青年同佢哋嘅家人都有責任，佢鼓勵時下青年勿自怨自艾，積極面對人生，更希望佢哋嘅家人放手畀班青年出去闖蕩吓、冒吓險！