中環耳目：一哥千金盛讚富臨炸子雞
名震天下嘅阿一鮑魚試過都讚頂呱呱，卓妮早前撞到一哥嘅寶貝女楊慕琴（Cecilia），仲勁讚老竇咁多年嚟對研製鮑魚作法一直好專注，呢種精神令佢一生受用。Cecilia鍾意食鮑魚之餘，仲極力推介爸爸旗下嘅富臨飯店炸子雞添！
不過，大家咪以為Cecilia喺爸爸公司幫手，其實佢係跨國速遞公司TNT集團嘅華南區總經理。Cecilia話佢工作好忙，平時喺廣州返工，經常喺中國周圍飛，冇咩時間享受美食，捱飯盒嘅時間仲多過出街食添！返到香港，佢會去富臨醫肚，最鍾意佢哋唔落味精；除咗鎮店之寶鮑魚外，最喜歡嘅菜式係炸子雞。
富臨陳部長同卓妮講，佢哋嘅炸子雞都係招牌菜嚟㗎！炮製秘訣係醃過後風乾成晚，令到雞隻乾身啲，等客人落單之後先至拉油，確保皮脆肉滑，所以好受歡迎，十張枱中梗有八張枱會點呢道菜式。陳部長又話，Cecilia喺香港時間真係唔多，但如果返到嚟都會嚟富臨食飯，阿一炒飯都係佢嘅至愛。