好咯好咯，知名度一向貼地橫行嘅副局長，終於有番啲啲咁多多名氣。呢嗱，環境局副局長潘潔今次起朵，激到運輸業生蝦咁跳，潘小姐芳姓大名深印腦海。
前日喎，立法會改善空氣質素小組委員會討論資助更換歐盟前期及一期商業柴油車計劃。由於計劃就快於三月底結束，不過申請比率只有兩成幾，唔知係心急如焚吖，定係勇字當頭，潘潔失驚無神咁樣講：「資助計劃完咗之後即時開始加牌費。」
講到呢度，大家可能未搞得清楚到底發生乜嘢事，等功夫茶簡單解釋一下。就咁，殘舊老爺車排放廢氣比較多，即係唔環保，換購新車可以達到減排嘅效果，所以特區政府推出利誘措施，資助車主貪新忘舊。之但係，雖然有資助啫，車主始終都係要攞錢出嚟買車吖嘛，所以換車效果唔係咁理想。既然利誘措施瀕臨失敗，潘潔把心一橫玩威逼，你哋唔肯換車吖嘛，好，罰你加牌費！車愈舊即係排放廢氣愈勁啦，懲罰性牌費就要相應更加多！
明未？潘小姐原來係鐵娘子，為咗車輛減排，為咗拯救地球，一於同職業司機大佬對着幹。可惜吖，運輸業人士一向唔係人咁品，發起火上嚟慢駛遊行塞爆中環都仲得，所以有人就揚言嘞，如果四月一日起真係加牌費，不排除激烈抗爭。
當副局長同運輸業紮晒馬，雙方火藥味甚濃之際，峰迴路轉咯，戲劇人生咯，局長邱騰華忽然跳出嚟演出一幕奧斯卡最佳電影《拆彈雄心》，佢話喎：「我冇呢個政治能力加牌費。」
邱騰華唔係撐下屬，而係摑一巴，究竟係將帥不和吖，定係大義滅親？功夫茶真係無從稽考，淨係覺得有一樣嘢非常之咁騎呢。喂，副局長話一，正局長話二，嘴形完全唔夾，深層次矛盾得好交關啫，靠呢兩個鬥氣男女攜手合作搞環保，掂檔唔掂檔㗎？
咦，四月一日咁啱係愚人節，莫非潘潔其實係同大家開玩笑？加牌費難道係惡作劇？不如咁講啦，潘小姐嘅幽默感未到家，搞到人哋唧都唔笑。
計功夫茶話齋，如果真係要搞爛Gag，成件事可以改編成一個笑話。
從前喎，地球出現一個環保女超人，誓神劈願話要改善空氣污染，所以出手打怪獸，所謂怪獸就係通街噴廢氣嘅大墨魚。點不知，環保女超人打怪獸嘅招數好獨特，唔係拳打腳踢，而係喋喋不休，喺大墨魚面前唸經咁唸：「好心唔好噴廢氣啦，唔係罰你㗎；好心唔好噴廢氣啦，唔係罰你㗎；好心唔好噴廢氣啦，唔係罰你㗎……」重重複複囉囉囌囌。好不幸，環保女超人唔記得自己肺活量十分驚人，每講一句說話，等於排放廢氣，空氣污染愈來愈嚴重。
老爺車未減排，副局長先排廢，呢個爛Gag確係好爛。