政情：何建立離霍英東集團
已故全國政協副主席霍英東嘅心腹兼好友何銘思近年一再向霍家後人興訟，雖然未知事件平息咗未，但霍英東集團尋日喺報章刊登「離任聲明」廣告，公布何銘思嘅兒子何建立即日離職及辭任該集團董事職務，強調何建立以後喺外間嘅一切華洋轇轕與該集團無關，又聲明何建立不得再用該集團名義及公司資料作私人用途，否則保留一切追訴權。
霍英東長子、立法會議員霍震霆尋日出席活動時，我哋問佢點解霍家咁高調登廣告，佢話只因為何建立另謀發展而辭職，佢都有「少少」可惜，仲話：「年輕人想多啲發展咪出去發展囉！香港有咁多嘢可以發展。」至於何建立離職係咪與近年何銘思與霍家後人興訟有關、係咪意味何家逐步淡出霍英東集團，小霍就無回應，佢亦無透露雙方嘅官司係咪已成過去。