今日嘅港府，凡係推出新政策都好似未諗清楚，環境局「病況」尤其嚴重。局長邱騰華前日下晝至出嚟否定其副局長潘潔上晝講關於加牌費嘅嘢，尋日立法會一份文件，再披露佢又衰咗，停車熄匙嘅立法，出台時間要比原定計劃遲。咁多甩漏嘅政策局，如果認真執行問責制，局長早就要被處分。
根據立法會原定嘅立法議程，今個立法年度政府總共要向立法會提交二十二條法案，當中包括硬性規定司機停車要熄匙嘅草案，應該大約喺農曆新年前就要向立法會提交，不過尋日立法會發出嘅最新文件就指出，停車熄匙草案都仲係未處理。
政府遲交草案唔算新鮮事，唔少立法會議員都鬧過。不過市民都好緊張環保，加上早前嘅膠袋稅搞到市民一頭煙，推動電動車計劃又有頭威冇尾陣，資助購買慳電膽嘅建議又已經煙消雲散，邱騰華有冇思考過自己嘅做事方式，其實出咗乜嘢問題呢？