政情：唐偉章回應「九宗罪」
理工大學舊管理班子早前畀教職員發表公開信，力數校方賤賣資產及涉利益衝突等「九宗罪」，理大校長唐偉章尋日開腔回應，話校方非常重視呢件事，已經成立專責小組調查，預計三個月內有結果，唐校長仲拍心口咁話，若然證實校方有錯，校方會承認錯誤，積極諗吓改善方法，一定唔會有所隱瞞。
唐校長尋日出席理大新教學酒店平頂儀式，一見到記者，就笑笑口咁話：「呢排畀你哋搞到好唔得閒。」完咗典禮仲自動自覺行到記者面前接受訪問，唐校長話，調查小組會檢討理大嘅招標程序、財政狀況，仲會調查理大附屬公司嘅運作同提升透明度，如果審計署真係展開調查，校方都會全力配合，有需要時可能會同前校長潘宗光會面。
至於理大舊年虧蝕超過五億，唐校長話主要因為投資失利，金融海嘯殺埋身大家都唔想，今年要視乎各部門嘅資源夠唔夠，如果有需要，可能會裁減教職員，但涉及嘅人數好少，幾十個都無喎，希望大家放心。