中環耳目：金島潮菜俘虜顏吳餘英
潮州菜受歡迎，好似喺國際巿場成功立足嘅「Maisto」系列玩具車製造商、美昌集團副總裁兼廠商會副會長顏吳餘英（Katherine），就係潮菜擁躉。做生意有聲有色嘅Katherine，係廠商會少數女副會長之一，可見佢嘅能力喺男人世界裏面毫不遜色。佢投入玩具車四十幾年，夠晒堅持，講起食嘢一樣咁長情，最愛尖沙咀星光行嘅金島燕窩潮州酒樓，幫襯咗二、三十年。
翅夠火候 滷水入味
Katherine係「家己冷」，特別鍾意食潮州菜。佢推介金島嘅菜式足夠擺一圍，包括紅燒翅、凍蟹、凍魚、豆腐同滷水食物等。以前公司喺觀塘，Katherine成日跨區醫肚，依家公司搬到尖東，去得更頻密。咁啱得咁蹺，九龍錶行董事總經理黃錦成都係金島fans，成日同太太拍拖幫襯。
金島以翅聞名，佢哋嘅金牌潮州翅用16寸以上嘅五羊片，加上唐排、老雞、金華火腿熬足六個鐘，原汁原味。至於出名嘅滷水鵝，滷水用咗33年，嗒落齒頰留香，選用正宗潮汕獅頭鵝，肥瘦適中，肉質鮮嫩彈牙。凍蟹就選用南中國海岸一帶嘅靚花蟹，用清水烚完再吊乾，保持鮮味。得獎無數嘅金島總廚吳木興師傅話，佢哋除咗保留潮州菜傳統特色，仲會揀時令潮州特產入饌，由冬至到清明先有嘅薑薯就係特色糖水。
卓妮