政情：黃宜弘無入股亞視執身彩
亞視股權易手峰迴路轉，好戲連場，早前盛傳亞視大股東查懋聲有意出售股權初期，一向有涉足出版娛樂行業嘅立法會議員黃宜弘同太太梁鳳儀都有意入股亞視，但最終未有成事。尋日問黃宜弘點睇亞視股權易手風波，佢冷笑幾聲後話：「好似亂亂哋喎！」咁有冇興趣入股？佢就哈哈笑咗幾聲，然後反問：「你覺得呢？」似乎暗示無興趣入股喎。
有位喺政商界打滾多年嘅前輩話，亞視就好似一個英雄塚，有錢佬入親去都損手爛腳，即使再有錢，咁蝕法真係肉都痛埋，每朝一起身開電視，就好似喺天星碼頭推部平治500房車落海。前亞視主席張永霖講過亞視依家每年都要蝕三億，到旺旺集團主席蔡衍明入股後蝕少咗，呢位前輩就話，依家只不過變為將一部售價較平嘅平治250房車推落海，蝕得無咁肉痛。
商界前輩話，亞視真係要靠孖「征（晶）」打救，內地商人王征出錢入股，亦可搵導演王晶幫亞視度橋。其實呢位前輩心水好清，王晶稱得上係橋王，如果大家睇過晶哥當年為亞視製作嘅《縱橫四海》同執導嘅《情陷夜中環》，就知道水準如何，兩劇集曾經令亞視收視率一度飆升，搵晶哥度橋，或者可以為亞視殺出一條血路都未定。