中環耳目：陳仲尼鍾情賀菊Toro Toro飯
香港青聯主席陳仲尼（Rock）好鍾意食日本菜，平時除咗幫襯中環四季酒店同尖沙咀帝苑酒店嘅「稻菊」外，原來仲鍾意去美心集團喺置地廣場地庫間「賀菊」日本料理，據聞係前任青聯主席嘅美心集團董事伍威全介紹畀佢嘅。阿Rock話最鍾意「賀菊」嘅Toro Toro飯，內含三種吞拿魚食法，包括免治、香煎、魚生，一次滿足三種口味，夠晒特色！
「賀菊」另一出色之作就係「東星斑天婦羅」，將東星斑起肉加上粉漿生炸，原條魚上碟，唔止賣相十足，食落香口鮮甜，成為阿Rock必選菜式之一。當然日本料理唔會咁少好嘢食啦，阿Rock仲介紹咗「上刺身拼盤」，有吞拿魚、甜蝦、三文魚、帶子、海膽等，夠晒新鮮。卓妮八到，立法會議員梁君彥都係「賀菊」常客，每次幫襯例必柯打個魚生飯食吓。
