柴米油鹽醬醋茶　衣食住行樣樣加

講起民不聊生，真係愈講愈心翳。高官話喎，香港經濟已經喺隧道中見到曙光，可惜平民百姓見到嘅唔係乜嘢曙光，而係一片加風，除咗打工仔份糧冇得加，衣食住行樣樣加加加加加！

呢嗱，就講公共交通工具呀，港鐵、渡輪、纜車啱啱加完，家陣又輪到專線小巴嘞。今年頭兩個月，運輸署已經批准咗十一條專線小巴加價，加幅由兩毫到六毫不等。仲有二十七條小巴線排緊隊等當局批准加價，另外部分小巴線更以經濟好轉做理由，取消收費優惠，收番正價，變相加價。

咁都得？專線小巴係普羅市民最常用嘅公共交通工具之一，政府容許佢哋話加就加，紓解民困原來得個講字。鬼咩，查實當局同營辦商早有「默契」，乘客就好似被綁住嘅羊，只能任人宰割。

事緣運輸署舊年批准七十幾條小巴線加價，當時金融海嘯搞到香港雞毛鴨血，市民媽媽聲，當局怕惹起民憤，使出一招掩眼法，向小巴公司施壓，要求降低加幅。小巴公司在商言商，加咗仲邊有得減吖，於是以「優惠價」名義降低加幅，等乘客更容易受落。

有優惠梗係好啦，弊在呢啲只係臨時措施，當局並無規定維持幾耐，小巴公司只要通知運輸署一聲，就可以取消優惠。好似一條來往坑口至北角嘅小巴線咁，舊年加價後全程優惠價十二蚊，優惠一取消，即刻收多五毫。咁即係住搶啫，當局任得小巴公司話加幾多就幾多，審批程序黑箱作業，咁咪即係夾埋營辦商搵市民笨？

唉，政府高官薪高糧準，衣食無憂，梗係唔知米貴啦，加風四起，民不聊生，怨聲載道，佢哋根本毫無感覺。家陣雖然通脹率唔算高，但除咗公共交通工具輪流加價外，好多涉及民生嘅必需品同服務都靜靜雞起晒價。唔好講其他，淨係去茶樓飲餐茶，茶錢都加咗一蚊啦。仲有吖，街市一斤菜心賣到十幾蚊，叫小市民點頂先？

講真，經濟環境係點大家心中有數，失業率居高不下，就算保得住份工，好多人都加薪無望。弊在加價風一波未平一波又起，草根市民百上加斤，雪上加霜，政府卻坐視不理。財政司司長鬍鬚曾啱啱發表嘅預算案，由頭睇到落尾都搵唔到一項長遠嘅紓困措施，全部都係聊勝於無嘅小恩小惠，市民有乜理由唔失望吖？

柴米油鹽醬醋茶，衣食住行樣樣加。煲呔曾話「回家真好」喎，冇錯，回家確實係好，問題係「回家真貴」呢！