護苗基金會長蕭芳芳獲選為最受信任人物，佢對兒童嘅愛護獲得充分肯定，不過佢謙稱自己又聾又懵，獲得嘉許可能因為屋企風水好喎，又話香港人對傷殘人士真係好好。長期耳鳴好困擾芳芳，不過耳鳴唔夠佢見到啲少女為咗錢去援交咁令佢心痛。佢認為政府應公開性罪犯嘅資料以保障家長及兒童或青少年，如果求職者同意至可以查閱，就只係做咗一半。半熟嘅蛋糕，根本食唔落肚。