立法會議員、「五散人」陳茂波（Paul）擊敗余若薇（Audrey）當選中文大學校董，不過阿Paul未上任已經同學生會擦出火花。事緣補選進行期間，阿Paul曾發信畀中大學生會，質疑會方「大細超」偏幫對手，學生會迅速「還拖」。
學生會知道阿Paul當選後，第二日即刻發公開聲明強烈譴責阿Paul，班同學仔言辭辛辣形容佢做「尊貴的議員」，又話對佢作出捏造事實等卑劣行為蒙羞。學生會仲質疑阿Paul做咗校董後，會唔會有容人之量聆聽不同立場意見，又要求佢公開道歉。
阿Paul尋日知道自己被狙擊後，嘆咗口氣話唔想作口舌之爭，公道自在人心，讓時間、事實說話。佢理直氣壯話做議員應該有乜講乜，佢當選前出信質疑學生會正係體現呢種態度。阿Paul話唔擔心以後同學生會溝通有問題，希望大家日後可以放低成見向前看。