呢，啱啱被揭發涉嫌集體蛇王嘅警隊又爆醜聞喇！灣仔警署日前以慶新春名義搞啤酒派對，為增加氣氛，仲安排着晒迷你裙、十足「模」咁款嘅啤酒女郎助興添。唔通灣仔警署提早「活化」，未變身做酒店，先變身做啤酒屋？

一杯落肚已經High high地，仲有辣到噴火嘅啤酒女郎落力推銷，加上出席活動嘅警區指揮官仲猛咁叫嘉賓「食多啲，飲多啲，影相影多啲」，結果喺觥籌交錯之下，短短兩粒鐘，過百支啤酒就一掃而光。

喺警署開啤酒派對已經夠奇，更得人驚嘅係，連當緊更嘅高級警官都百無禁忌隊埋一份，執勤隊啤兩不誤，盡興後至繼續當值。唔係啩？警務人員擅離職守已經唔啱規矩，如果飲埋酒，更加係觸犯天條嘅「死罪」。假如有人佗槍執勤更加唔講得笑，大吉利是飲到啤啤夫失控，搞出人命點算？

最離譜嘅係，為咗令啤酒派對順利進行，警方居然將警署對開四十幾個咪錶車位封閉超過三十粒鐘，畀自己友泊車。仲有吖，派對期間為方便影大合照，有警員索性「封路」，一度造成交通擠塞，搞到市民媽聲四起，怒斥警方擾民，「公器私用」。

咁警方又點樣解釋呀？佢哋話喎，今次啤酒派對係由協辦單位安排，又強調《警察通例》規定攜帶槍械嗰陣唔可以飲含酒精嘅飲品，一於塞責迴避兼死撐。

無謂諸多解釋嘞，其實近排涉及警務人員嘅醜聞一籮籮，警隊聲譽幾乎已蕩然無存。舊年年底本報揭發有警官涉嫌假公濟私，搭水警輪到蒲台島開海鮮大食會；今年二月初，水警長洲分區一班警務人員又涉嫌當值期間「蛇」去酒家歎海鮮，煲煙劈酒玩骰盅乜都齊，有人甚至連踩兩場喪蒲到半夜至返警署。警隊高層尋日回應再有水警被踢爆懷疑集體蛇王時話，警方舊年十月已經發出誠信指引，如果發現有警員明知故犯，會作出嚴格嘅紀律處分。

唉，算罷啦，如果唔加強監管，從嚴處置，增加指引有鬼用咩。好似當更唔准飲酒呢條，《警察通例》早有列明，咪一樣有人當冇到，照飲可也。以前呢類個案好少發生，近年久不久就爆一鑊，而且鑊鑊新鮮鑊鑊勁，好明顯係管理出咗問題啦。

話時話，上至高級警官，下至前線人員，上行下效，各有各醜，警隊形象一落千丈。唔怪得有雜誌啱啱公布本港最受信任人物及行業調查結果，警員嘅排名只得十八，成為紀律部隊包尾大幡。

警隊其身不正，失信於民，仲有乜資格維護法紀、除暴安良吖？