新界鄉議局近期頻頻撲水，為沙田石門新大樓籌募建造費，主席劉皇發聯同副主席張學明上周二帶隊向華置董事劉鳴煒募捐，但當日未有着落，鳴煒話要約發叔再見面，點知過去幾日話咁快就見咗面，仲開咗張五百萬元支票捐畀鄉議局，認真爽快。發叔話，大家都姓劉，等於兄弟一樣，總之佢代表新界人答謝佢嘅慷慨支持啦！
到目前鄉議局新大樓建造費仲差五千萬元，局方都係要繼續諗計撲水。張學明愈來愈精叻，近日瞄準政府今年四月起開水喉向村代表發放每季二千元津貼，於是靈機一觸，建議村代表將四年任期嘅津貼，捐一半畀鄉議局起新大樓，如果以約一千五百個村代表計算，四年就捐到二千三百多萬元。
學明話，相信班村代表會好樂意捐款，因大家互相幫忙，學發叔話齋：「有權利就要有義務」。
不過，呢個如意算盤打唔打得響仲係未知數，事關非原居民村代表會否咁順攤捐錢畀局方實在好難講，咁就要睇吓學明點說服班村代表喇！