黃竹坑警察學院尋日星光熠熠，除咗警隊前一哥李明逵，影星任達華同太太琦琦、仲有千金小晴佳都有到場；梗係啦，尋日係警隊二哥任達榮第一次以檢閱官身份主持警察結業匯操，亦係最後一次，事關任Sir將於本周五榮休，告別工作咗卅七年嘅警隊，身為細佬嘅任達華一家梗要嚟撐場，認真手足情深！
名模琦琦畀人影相就影得多，但尋日佢拎起相機為大伯一家同賓客影相，儼如小粉絲；打扮成小公主、即將升讀小學嘅小晴佳不時露出趣怪表情，頓成焦點。
任Sir嘅仔女專程由外國飛返嚟支持爸爸，任Sir位公子喺外國讀藥理，之後去咗柏林工作，囡囡則喺外國修讀心理學，依家一齊返晒嚟，係任Sir榮休嘅最佳禮物。任Sir話過旅遊唔係佢興趣，去勻全世界，最鍾意係香港，退休後會先裝修間屋，閒時打吓乒乓波同畫國畫，最近仲跟細佬一樣，愛上影相，或者兩兄弟遲啲會搞個攝影展或畫展Crossover。
好耐冇見嘅中大人李明逵就連踩兩場，之後又出席中大榮休教授金聖華新書發布會。佢自嘲退休前揸槍，退休後揸鑊鏟，個肚冇半點墨水，係文化聚會稀客，但金聖華當年幫過佢寫榮譽院士撰辭，所以一定要嚟支持。