一年一度嘅渣打馬拉松今日舉行，各參賽者都希望成績可以一年勝一年！醫院管理局七大公立醫院聯網中，今年至少有兩個聯網總監參賽，其中新界東聯網總監馮康醫生有多年參賽經驗，佢今年報名跑全馬。馮康同我哋講，今年賽道有變，尤其昂船洲大橋嘅賽道特別斜，加上天文台預告今日濕度隨時達百分之九十五，氣溫仲熱到廿幾度，佢有啲擔心會跑得辛苦，所以今日會錫身啲，唔會監硬嚟。
馮醫生又向全港參賽者大派貼士，話大戰當前，自己近排做多咗拉筋運動同緩步跑，食多啲健康又有營養嘅食物，增加比賽能量，以便全力作戰。
候任港島西聯網總監陸志聰醫生都有參賽。佢話雖然下月會去美國哈佛大學深造管理課程，但為咗今日嘅比賽，平時亦會練習，應付十公里長嘅半馬賽事。呢兩位醫院嘅聯網總監平日忙於處理大小事務，仍抽空參賽，都算唔話得啦！