本文重點
一年一度嘅人大政協「兩會」會議星期三（三月三日）就喺北京開鑼，歷時約近兩星期。每年呢個時候，唔少身兼人大政協嘅立法會議員都要京港兩邊走，一嚟要防止立法會流會，二嚟就要提防泛民突襲，以免泛民趁建制派人腳單薄通過啲具爭議性議題。不過，今年兩會大家似乎舒服好多，事關建制派一早部署好晒，加上佢哋鴻運當頭，喺兩會期間嘅三月十日立法會周三大會，建制派抽到全部動議辯論嘅機會，杜絕泛民有玩嘢嘅機會，睇嚟今次上兩會嘅議員都可以好安樂嘞！
開完先上京 提防余若薇
今屆立法會有十四個議員身兼人大代表或政協委員職務，除咗立法會主席喺每周三立法會大會時會向北京請假、以便留喺香港主持會議外，其他十三人多數都會上晒北京開會，加上泛民有五個議員玩辭職，立法會因為未達法定人數三十人而流會嘅機率高咗唔少。不過建制派一早計好數，叫晒啲唔使上兩會嘅人乖乖準時開立法會，確保三月三日同十日嘅立法會大會順利舉行。
不過，為防止泛民趁建制派人少通過對佢哋不利嘅議題，建制派今年索性出絕招，傾巢而出搵晒唔使上兩會嘅建制派議員出嚟抽動議辯論，最後連天都幫埋佢哋，畀民建聯陳克勤同中總立會代表黃宜弘喺最少人開會嘅十日會議上，抽晒所有動議議題，佢哋會提出低碳生活同設立與兒童有關工作性罪行紀錄核查機制，內容無乜大爭議，要上兩會嘅議員可以無後顧之憂，唔使驚要飛返香港投票。
不過喺本周三（三月三日）政協開幕當日，公文黨黨魁余若薇（Audrey）會提個叫市民積極參與補選嘅議案；雖然呢個議案冇所謂「公投」等敏感字眼，不過建制派都唔想再畀機會佢哋炒熱「公投」議題。據了解，工聯會同民建聯都會派人留港開埋星期三嘅立法會會議再上京，杜絕甩轆情況出現，所以即使Audrey成功拉到民主黨同個別泛民議員撐佢，最後動議都好大機會過唔到。搞掂晒啲動議議題，再加上未來兩個星期都冇重要嘅法案同質詢，議員上京自然安心又放心。