本文重點
人大政協兩會逼近，除咗要準備個腦之外，個篋都係時候要執定。前日中聯辦舉行新春酒會，卓妮都去湊湊熱鬧，一眾準備赴京嘅港區全國政協委員及人大代表，都着定到時分分鐘會帶上京嘅戰衣來個Preview，絕無收收埋埋。
「神經富豪」楊釗雖然係牛仔褲大王，但上京開會，正規西裝又點少得；向來鍾情於法國品牌Lanvin嘅佢，準備咗兩套西裝上京。楊釗話男人唔使太姿整，亦唔需要護膚，無咩特別嘢要執，但始終去成十幾日，所以日用品同便服絕對唔少得。家有賢妻嘅佢話，太太已經幫佢打點好行裝，但出發前自己都會睇吓，掛一漏萬就唔好啦！
大輝帶定潤膚膏
至於舊年十月着改良式中山裝上京嘅廠商會立會代表林大輝，前日都係一樣，分別只係尋日套衫較歐化，領口設計唔同仲修腰添。兩件都係度身訂造，大約七、八千蚊，大輝前日着嗰件，仲係啱啱出爐嘅添。大輝做紡織出身，向來鍾意睇雜誌再加少少自己設計，唔會淨係跟潮流走。除咗中山裝，大輝仲會帶多三、四套傳統西裝，事關始終係開會，着傳統西服適合啲。大輝今次會去晒成個會期，行李都要帶多啲；經常出門嘅佢，自嘲係草根階層，適應力強，北京嘅乾燥天氣難唔倒佢，但一支看門口嘅潤膚膏就唔少得。
經濟動力嘅林健鋒（Jeffrey）今次會以藍色作為全個行程嘅色系，出慣門嘅佢話出門着同一色系衣服方便襯衫。佢預備咗兩、三套西裝、仲有一件長褸同一件短褸帶上京，恤衫就揀咗白色同粉藍兩隻色，襯藍色長褸包無走雞。簡潔嘅行李箱仲會配備一支潤膚膏，事關Jeffrey唔怕凍只怕乾，無潤膚膏唔得！
卓妮