本文重點
霍家今年與雪有緣，除咗小霍霍震霆農曆新年同囝囝啟剛、啟山結伴去溫哥華為冬季奧運會開工之外，霍震寰一月亦同家人去瑞士滑雪。小霍此行有未來新抱郭晶晶陪住過年兼做生日，幸福到痹，但啟剛前日陪爸爸出席中聯辦新春酒會，對此行相當口密，點都唔肯話畀卓妮知有幾Sweet。
小霍情人節生日，今年遇正大年初一，有囝囝同準新抱陪住嘅小霍，喺白雪雪嘅溫哥華一樣暖笠笠。咁幸福，難怪佢生日願望都係代人求，話希望中國同香港運動員喺冬運會表現出色，世界和平。
霍震寰難得團聚
孖住女友郭晶晶一齊去溫哥華嘅啟剛，既陪爸爸團年賀生日，又畀人影到同晶晶甜蜜蜜出席開幕禮，一舉兩得！不過一聽到卓妮同佢提起「晶晶」兩個字，佢就笑笑口話唔講嘞。
農曆新年無出門嘅霍震寰，原來一月份同老婆、囝囝啟文同啟中去咗瑞士St Moritz滑雪，舊年囡囡思緯都有一齊去日本滑雪，今年就唔得閒。雖然五缺一，但霍生一樣玩得好開心，事關佢超愛滑雪，加上平時佢哋一家人忙到分開幾個國家生活，去旅行先可以形影不離見足幾日，難怪呢位忙碌爸爸咁珍惜呢個旅程！
之前有位皇仁學生滑雪出意外，霍生覺得每樣運動都有一定危險，好似佢咁，雖然滑咗好多年雪，但安全措施依然做足，今年去滑雪見到有頭盔賣，仲即刻買番個，但最後無用到。霍生話滑雪好似行路咁，如果要同人鬥跑梗危險啦，但雪道點都要有斜位先好玩，只係佢唔會向高難度挑戰，總之玩得開心亦要安心至得。
卓妮