本文重點
甘乃威去年嘅求愛不遂怒炒助理事件震驚政界，雖然當時甘太身體力行支持甘威，陪同佢出席記招，但都有好多人認定呢件桃色醜聞會成為佢哋兩人嘅愛情大考驗。事隔半年，甘威尋日就一副甜到漏嘅樣，話同太太比以前更加sweet咁話。
IT豪牛一收孝心蛋糕
甘威尋日同我哋講，佢今年情人節除咗買咗盒朱古力外，仲另外買多樣可以「戴喺身」嘅禮物畀太太。甘威死都唔肯透露嗰份禮物係咩，但就話為咗呢份禮物「破財」，仲話太太收到之後好開心添。甘威今次咁大手筆係唔係為咗補鑊，佢兩公婆最清楚嘞。
另一邊廂，IT界立法會議員譚偉豪亦都過咗個甜蜜嘅生日。話說尋日係IT豪四十六歲生日，雖然佢一整日都要喺立法會開會，但佢囝囝為表孝心，就喺屋企整定蛋糕，同埋媽咪一齊帶去立法會同佢慶祝。IT豪囝囝Authur仲話，為咗確保個蛋糕「食得落肚」，佢尋日已經整咗一個試食，確定冇問題之後，今日再整多個。齊齊喺立法會食完蛋糕後，IT豪仲會撇甩囝囝，同太太過澳門過番晚二人世界添，認真羨煞旁人。