唔單止咁，有份出席嘅全國政協劉夢熊當面質疑政府搞五區補選浪費公帑，據聞煲呔曾竟然回應話：「選舉制度係有漏洞，不過無辦法，玩一次都要！」口脗輕佻，咁講擺明將一億五千萬公帑當成遊戲咁玩啦！

嘲委員不如兩歲細路

煲呔曾尋日以一貫笑臉虎姿態會見班港區政協。記得去年今日，煲呔曾喺兩會前嘅會面中，一度暗示班人大政協上京後唔好一味唱衰香港，又為推動粵劇問題同政協「阿姐」汪明荃展開罵戰，所以班政協尋日已經預咗唔慌有好嘢。果然不出所料，有份與會嘅「新金王」黃英豪會後引述煲呔曾話，每年北京兩會期間，特區政府都有宴請酒會，希望各位政協去北京開會時多多捧場，但聲音就要「」（細聲啲）嘞。

煲呔曾慌死大家聽唔明，仲用自己兩歲孫女做例子，話孫女一睇到電視播出國歌時就會嘟起嘴「」一聲，示意大家留心聽住。據聞煲呔曾講話時臉帶笑容，嘉賓覺得佢幾幽默，仲拍晒手掌添，之不過聽唔聽得入耳就見仁見智喇！事關呢番話訓斥意味濃，心水清嘅人都知煲呔曾去年喺特區政府酒會致辭時，台下嘈過街市，無人聽佢講嘢自然口黑面黑，情形同前年亦都差唔多。

轉眼又一年，估唔到煲呔曾咁記仇，仲要喺咁嘅場合笑笑口發爛渣，盡顯九流政治家本色，連尊重人咁基本禮貌都唔識，仲想班政協聽佢致辭？可笑嘅係，煲呔曾竟然將聽國歌與自己致辭相提並論，簡直不自量力，而佢借自己孫女過橋暗寸班委員，更可以話係無禮，煲呔曾自己檢討吓啦。