好似玩具大王蔡志明太太咁，佢今個新年就同蔡生、細女加怡同囝囝加讚，加埋喺波士頓嘅親戚，四十幾人浩浩蕩蕩去美國拉斯維加斯玩個夠。蔡家係虔誠基督教家庭，去到賭場林立嘅拉斯維加斯，蔡太都過門不入唔會去賭，加上蔡家喺美國有唔少生意，所以此行蔡生同囝囝加讚公務纏身，玩之餘亦要處理美國業務。

邱太家有喜事

咁蔡太有咩好做呢？咁就多囉，幫手招呼親友同打點旅程啦。點知蔡太好謙話：「無無無！我只係忙食同玩，無出過咩力。」佢話此行仲睇咗好多唔同類型嘅精彩表演添，好似許冠傑演唱會、大衞高柏飛嘅魔術、歌聲魅影、獅子王等等，總之睇到佢拍爛手掌。

至於維多利亞教育機構總監兼創辦人丁毓珠校長同邱達昌太太一家，咁啱都去咗星馬享受陽光，邱太嘅外形同真實年齡成反比，佢面紅紅咁話，可能同自己鍾意做運動有關，事關佢一星期起碼跑三日步同游水，即使去旅行都一樣無鬆懈，加上心情開朗，所以令人覺得佢年輕。不過呢位「後生」媽咪再過幾個月就家有喜事，因為二女詠賢結婚後喺君悅酒店補擺喜酒，邱太大讚女婿好仔，仲話希望囡囡快啲幫佢生個外孫添。

連曾孫都有埋嘅公仔麵大王太太周嚴雲震，今年留港無出埠，已經年過八十嘅周太，精神好好之餘，仲同卓妮大談時裝經，又攞自己個名嚟開玩笑，話以前啲朋友最怕同佢一齊坐飛機，因為怕啲雲會「震」，認真可愛。全國政協委員蔣麗芸就話，新年跟大隊去咗廣東西部玩，隊長係「新界王」劉皇發，佢哋去勻江門、開平、陽江等，最難忘係當地天氣凍到得番三、四度，第一晚住嘅酒店竟然無暖氣，搞到佢輾轉反側瞓唔着。

周嚴雲震（左）打扮一絲不苟，更常幫襯身旁嘅皇廷鑽飾老闆娘陳美汎。

丁毓珠（右）與女兒孔美琪結伴赴宴，新年佢哋齊齊到新加坡遊玩。

卓妮