香港中華廠商會尋日舉行新春團拜，一眾核心成員個個春風滿面、虎虎生威，原來大家都過咗個好relax嘅新年，好多人不約而同選擇咗澳洲、泰國呢啲旅遊勝地避寒度歲，唔使喺香港挨凍！會長黃友嘉、副會長施榮懷都去咗澳洲，吳永嘉就去泰國食嘢購物，大家都話玩得好開心！
黃友嘉同太太兩人去澳洲拍拖玩咗八日，仲租咗架車自駕遊，兩人輪流揸，好耐未試過咁輕鬆。問佢係咪好似重溫蜜月時光，佢笑謂咁耐之前嘅事，唔記得囉！
施府飛機餐當團年飯
副會長施榮懷就同父母兄弟一行十六人包團暢遊黃金海岸、雪梨，年三十晚就喺飛機上食飛機餐當係團年飯，夠晒不拘一格。
佢話最開心係喺泥地捉泥蟹，然後出海釣魚返嚟食，日日游水、曬太陽，個個都玩得不亦樂乎，難怪卓妮覺得施榮懷好似高大有型咗，原來係曬黑咗啫！
施榮懷話，佢哋一家人成日都會出埠過年，遠近都有，近近哋就去台灣、澳門，最緊要係同父母一齊去玩，成家人都覺得好開心。施子清有個咁孝順嘅囝囝陪住，家族事業又放晒手畀下一代，佢真係可以享清福囉！
吳永嘉推介曼谷美食
澳洲正值盛夏固然受到港人歡迎，全年熱騰騰嘅泰國亦係港人出遊熱門之選。副會長吳永嘉攜同老婆、阿媽同大佬一家人同遊曼谷，豪住半島酒店。
吳永嘉推介當地一間名叫Sokhu Thai嘅餐廳，勁讚啲食物好味，凍龍蝦、燒和牛肉、鵝肝同埋燒肉任食，不過周日每位盛惠約八百港元，都唔平㗎！
港區政協常委陳永棋同老婆、大女及女婿把臂共遊澳洲，仲租車穿梭亞德萊德同墨爾本之間，棋哥後生時曾經揸車到美國國土最南端Key West，今次澳洲之旅令佢重溫後生時嘅豪情壯志添！
卓妮