本文重點
去年接連有兩名男性立法會議員搵到人生另一半，加上前財政司司長梁錦松同前金管局總裁任志剛，都係年過五十先至結婚再婚，令到唔少差不多年齡嘅單身男士「重燃希望」。堪輿學家麥玲玲尋日喺馬場爆料，話今年係九紫喜慶星入乾宮，「乾」泛指年長男士，特別係五十歲或以上、有社會地位、而又未婚嘅男性，今年都有望紅鸞星動，好可能係老夫少妻，仲有機會喺同年內添丁，當中又以生肖屬虎、蛇、猴同豬嘅最有機。
綜觀一眾男性高官，各司、局長都已有家室，比較近磅嘅有公務員事務局常秘黃灝玄同民政事務局常秘楊立門，前者啱啱好五十歲，後者差少少就夠秤，不過兩人一個屬鼠，一個屬牛，並非麥師傅口中最有機嗰四個生肖。
「怪醫」隨時有驚喜
立法會議員方面，男性大部分都已婚，仲係孤家寡人又差唔多夠五十歲嘅，只有醫學界「鑽石王老五」梁家騮，加上「怪醫」本身屬虎，隨時會畀大家一個驚喜。早前同太太離咗婚嘅街工梁耀忠，現年五十七歲屬蛇，合晒麥師傅所講嘅標準。