百達製衣執行董事蔡少洲（Tony）係潮州商會活躍分子，早前卓妮喺「香港明天更好基金」活動撞到佢，Tony話佢啱啱喺商會旗下嘅青年委員會「畢業」，搞到卓妮一頭霧水。原來佢早前啱啱足五十歲，唔可再留低喺青委會喇，不過咁唔影響佢喺商會活動，繼續係其中一名最活躍嘅會董。
Tony對商會有歸屬感，連食嘢都首選上環潮州商會總部一樓會所。佢最欣賞會所唔落味精、唔用豬油，好迎合現代人健康潮流，佢推介熏鴨、滷水鵝，仲有個個都讚好嘅凍蟹，可惜佢敏感唔食得。至於潮州翅就更加唔話得啦！原來個廚師喺私房菜館做過，難怪開咗四、五年來，試過嘅都話正。
卓妮問佢會唔會覺得潮州會所係香港潮菜之中嘅一哥？佢直情係內舉唔避親，賣花讚花香啦！Tony講到咁正，連喺旁邊嘅恒隆主席陳啟宗都忍唔住話要去食吓。
卓妮