虎年到，着住唐裝衫去拜年就最應景。鄉議局主席劉皇發都係唐裝迷，每逢大年初二去車公廟求籤，例必換上新簇簇嘅唐裝。今年發叔就揀咗購自「中藝」嘅棗紅色唐裝，佩上金黃色絲質頸巾，顯得容光煥發。
發叔每年向車公上香祈福前都會齋戒沐浴，並會度身訂造或者買番套新唐裝以表誠意，例如○七年就着金色唐裝衫再加多一條紅頸巾，舊年同前年可能天氣冇咁凍，就齋着金色唐裝衫冇攬頸巾。唔知係咪因為去年為香港求咗支下籤，想搞吓新意思轉運，今年發叔轉咗着棗紅色唐裝加金色頸巾，話：「着紅衫好意頭啲。」結果就求得一支中籤，總算好過去年。
原來呢身打扮係出自發嬸手筆，係「中藝」嘅出品。件衫用上真絲靚料，盛惠逾千銀，條頸巾就要幾舊水。發嬸話「中藝」開業逾五十年，專賣中國工藝品、唐裝衫及玉石等，唔少遊客一諗起「China Look」，都會去「中藝」走一趟。
卓妮