如果大家唔明白二十萬人一間圖書館嘅比例有乜咁古怪，不妨借用澳門概念諗一諗。澳門人口五十萬，假如根據香港準則辦事，即係只可以有兩間圖書館，頂多兩間半，你話係咪荒謬絕倫先？

秀茂坪家陣話就話已經有一間圖書館，不過係屬於迷你版本羽量級，面積不足三百平方米，座位寥寥無幾，不少書迷迫於無奈席地而坐，讀書讀得咁辛苦，睇怕只有鑿壁偷光嘅古代讀書人匡衡先至體會得到。而且呢間所謂圖書館係殘廢嘅，居然不設自修室，學生哥想搵個耳根清淨之地溫習功課都唔得。

你知啦，香港居住環境係讀書人嘅天敵，室內狹狹窄窄，室外嘮嘮嘈嘈。你想讀書咩？阿爸話要睇電視，阿媽話要打麻雀，細佬細妹又話要打機。就算全家上下總動員出外飲茶睇戲行街街，你都咪以為獨留家中能夠安心讀書，左邊有人打樁，右邊有人掘地，中間有個阿嬸擘大喉嚨鬧仔，你試下喺咁嘅噪音環境之下讀一讀唐詩三百首吖，睇怕未讀完「床前明月光」，發晒憎嘅你已經想「落街搵人劏」。

所以話啫，自修室對於本地知識型經濟係必不可少嘅。學生哥固然需要自修室，成年人一樣需要自修室，起碼老公老婆嗌完交之後有一個避難所，盡量避免深水埗西九龍中心阿媽一怒之下掟阿女落樓嘅悲劇發生。

呢嗱，就咁，唔係個個官僚都咁食古不化㗎，房屋署其實明白秀茂坪街坊嘅苦處，所以一早已經同區議會商量過，趁秀茂坪第十期重建，喺社區會堂重置圖書館，同時加建自修室。可惜吖，房屋署雖然開綠燈，康文署仍然扯後腿，墨守成規堅持二十萬人一間圖書館嘅比例，打死都唔准加建。難怪立法會議員王國興狠批準則過時，未能切合實際需要，直斥康文署「一本通書睇到老」。

計功夫茶話齋，康文署官僚應該係不學無術嘅野蠻老粗，點解咁講？道理好簡單，只要係熱愛讀書嘅知識分子，一定對於圖書館有一種難捨難離嘅情意結，冇可能麻木不仁漠視民間嘅讀書呼聲。喂，你試下由諾貝爾獎得主高錕主政康文署吖，秀茂坪睇怕第一時間出現一座書香橫溢嘅知識寶庫！

話時話，康文署署長係邊個？好似係一個叫做馮程淑儀嘅物體，如無意外唔係文盲。嗱，馮程署長，唔好話功夫茶唔點醒你，知識型經濟需要大量自我增值讀書人，莫講話秀茂坪唔夠圖書館，其實全香港一樣少得可憐，二十萬人一間圖書館嘅比例可以講係有辱斯文。退一步講吖，你寧願學生哥去自修室溫習功課，定係掟佢哋出街索Ｋ？所以咯喎，唔好阻住地球轉，盡快加建圖書館！