煲呔曾去年上京述職，話香港今年或出現「雙底衰退」，言論一出即時惹嚟噓聲。經濟動力議員林健鋒Jeffrey新年外遊，尋日同傳媒提前慶祝新年，談到煲呔曾嘅「雙底衰退」論，Jeffrey話只要特區政府做好刺激經濟措施，如延長中小企特別信貸保證計劃，咁出現雙底衰退嘅機會就會大減。
Jeffrey解釋，前年金融海嘯殺到，由政府擔保、銀行借錢畀中小企嘅特別信貸保證計劃，確實幫到唔少中小企，今年六月底計劃結束後，政府應將信貸保證計劃延長，咁出現雙底衰退嘅機會就細好多啦！Jeffrey一向係支持政府嘅中堅分子，以佢嘅牙力說服政府唔難，睇吓預算案有冇好消息。
講完經濟，Jeffrey攞咗部鎖匙扣形嘅酒精呼氣測試機出嚟，當做新年賀禮。呢部小型測試機攜帶方便，係標檢集團嘅出品，Jeffrey主動申報，話自己係集團董事。