維園花市尋日正式開鑼，雖然天公不作美，但春雨綿綿無損民政事務局副局長許曉暉（Florence）行花市嘅雅致。Florence尋日落維園力撐社企攤位，仲化身財神爺，掏腰包用咗近八千蚊，買一百盒社企做嘅曲奇禮盒，每盒盛惠七十八蚊，都咪話唔畀面！
個攤位由社聯幫手投得，四間社企合作營運，其中由明愛天糧出產嘅「虎步開財路賀年曲奇」仲非常好賣，入面好得意嘅「虎掌」形狀曲奇深得Florence歡心。原來Florence早前已入咗一百盒曲奇禮盒，諗住新年用嚟拜年；佢仲喺現場開咪叫市民幫襯，氹到班社企職員眉開眼笑。
近期Facebook熱爆政界，被視為官民直接溝通新橋樑，Florence都開咗個戶口。睇番Florence個Facebook都幾熱鬧，有人讚佢覆留言覆得快，誠意可嘉，亦有人轟佢似做政治show多啲；最搞笑係有人話佢應該開個虛構人物嘅戶口，好似古代皇帝微服出巡咁，咁先可真正試探民情喎。