新年將至，立法會批發及零售界議員方剛搶先向商販派發揮春拜個早年。一張揮春唔值得幾多，商販見方剛咁有心，興奮如遇見「四大天王」出巡，大讚佢靚仔有型。受寵若驚嘅方剛自掏腰包買下百二蚊賀年糖果，同商販打成一片。
尋日朝早十一點幾，方剛攞住大疊紅噹噹揮春現身灣仔太原街市集，商販見有好意頭，揮春攞完一張又一張，就連買緊餸嘅街坊都嚟趁熱鬧。熱情難卻，方剛派到滿面汗珠依然未停手，仲主動走近售賣賀年糖果攤檔，一口氣掃咗十幾包花生糖及炸角仔，話要同商販打氣，之後轉搭「叮叮」直踩銅鑼灣渣甸坊繼續派。
經濟漸見復甦，但方剛話今年受各國部署退市影響，營商環境仍然艱難，提醒小商戶量力而為，千祈咪過度借貸喎。咁新年去邊度？方剛話會留港陪伴年邁嘅母親，為佢預備豐富齋菜做團年飯，認真孝順。