年近歲晚，應酬飯局浪接浪，一眾區議員尋日中午相約去灣仔皇朝會開餐，大部分係民選議員，部分係委任議員，身兼沙田委任區議員嘅立法會議員林大輝、沙田區議員龐愛蘭、湯寶珍及觀塘區議員徐海山都係座上客之一，林大輝仲係唯一一位立法會議員添。飯聚傾啲乜？眾人對事件三緘其口。咁啱得咁蹺，席上仲有一位稀客，就係中聯辦社工部部長張鐵夫，莫非佢嚟收風？
湯寶珍透露，餐飯有廿幾人應約，包括部分區議員及其朋友，聽落相當齊腳，如果唔係有重大議題，好難叫齊咁多人噃？湯寶珍就話，席間只係天南地北講吓城中熱話，無講五區請辭後嘅補選問題。其實補選問題已燒埋身，隻字不提又認真奇噃！
有份聚餐嘅新論壇成員龐愛蘭都話，席間無講補選話題。龐愛蘭曾經話過有意參加補選，問佢依家係咪都去？龐小姐輕描淡寫話，若然呢次真係一場補選，會考慮參加喎。依家中央唔認呢場係補選噃，煲呔曾都話唔去投票，睇嚟佢唔去馬嘅機會都好大。