輸少當贏 不思進取

麻雀枱上有一個術語叫「棄胡」，即係評估形勢覺得無胡食，不如輸少當贏，不求進取，只求摸完鋪牌打和就算。依家煲呔曾就係以呢種消極嘅棄胡心態打特區管治呢鋪牌，不思進取，但求每日餵吓錦鯉、吹吓口哨，或者同八十後燒吓烤，悠悠閒閒過埋未來呢兩年半就埋單走人。而煲呔曾呢種想法，尋日喺一份報章嘅專訪中表露無遺。

煲呔曾喺訪問中講，每日朝早都諗緊退休，而卸任嘅佢有可能會離開香港一段日子。記者問佢，有冇諗過卸任後，會同老董一樣去做全國政協副主席？煲呔曾無否認，只係叫大家唔好咁多揣測。真係鬼拍後尾枕，寥寥幾句真心話，將煲呔曾一直隱藏喺心中陰暗角落嘅想法，全部抖晒出嚟。不過，佢有冇得做全國政協副主席，真係天曉得！

香港政局紛亂，貧富懸殊日益嚴重，經濟轉型又未成功，煲呔曾身為特區最高負責人，唔係日夜想設法解決，而係朝思暮想諗退休，佢都真係得囉。不過，掉轉嚟諗，煲呔曾管治差劣，如果佢真係願意翹埋雙手，唔搵香港較飛，可能反而係港人之福；既然佢依家有退休心願，我哋惟有預祝佢退休生活富貴吉祥，日日歎奶茶王，夜夜食煲仔飯，同埋提醒佢記得買相機連長鏡頭，事關無咗官銜，以後再去南生圍影雀仔，就唔可以問政府新聞處借鏡頭㗎嘞。

記得煲呔曾○六年講過，退休後唔想對下任阻手阻腳，所以一定離港，當時佢仲實牙實齒話，為咗令港人盡快忘記佢，會遠走他方，唔會返內地，唔會去英國，更加唔會去兒子工作嘅美國；煲呔曾其後反口，話想退休後返內地生活，到底煲呔曾邊句至真？依家煲呔曾話日日諗住卸任後離開香港一段時間，唔知佢諗清楚去邊度未呢？