本文重點
華懋慈善基金會喺世紀爭產案中獲得初步勝利後，當日龔家佔大股嘅上市公司安寧控股，已第一時間升逾兩成慶祝。連日來龔家心情靚絕，尋晚與龔家好友同安寧員工，喺安寧嘅旗下顯達鄉村俱樂部食團年飯，畀卓妮撞個正着，卓妮見龔仁心夫婦神情輕鬆，身為安寧獨立非執董嘅世交富豪趙世曾都同一對仔女出現，睇嚟今年龔家陣營終於可以過個歡樂嘅新年啦！
幾架旅遊巴載員工
尋晚大約七時左右，龔仁心妹妹龔因心率先乘坐七人車到場。約七時半，一直立場鮮明支持龔家嘅趙世曾，乘坐藍色勞斯萊斯開篷車風騷到場，俱樂部位於荃灣半山上邊，尋日斷斷續續落雨，但都無損趙家盛裝與會，車上同坐嘅仲有囝囝式浩同囡囡式芝。
廿分鐘後，龔仁心夫婦乘坐豐田七人車來到，佢見到在場傳媒都有揮手致意，睇到佢神色輕鬆晒。梗係啦！龔醫生都話天地有正氣，佢咁多年來嘅鬱結終於一掃而空嘛！尋晚卓妮都見到幾架旅遊巴，接載安寧員工嚟聚餐，而華懋售樓部總經理吳崇武都有赴會。大家辛苦咗一年，好應該獎賞吓嘅，凝聚軍心準備最後決戰！
晚宴歷時約三個鐘，龔仁心夫婦及趙世曾一家喺十時十五分離開，龔仁心走時不忘向傳媒再打個招呼。趙世曾就話同安寧同事一齊團年好開心，魚、菜、乳豬樣樣齊，仲有歌舞贈興，又有現金大抽獎，佢自己都有落場跳番隻舞，但最高嘅現金獎三千蚊，佢就抽唔到啦！
顯達俱樂部係安寧控股物業，公司有股東大會之類嘅活動，都會喺度舉行。俱樂部同如心廣場隔空相望，係龔家嘅風水寶地！
卓妮