前東華三院主席馬清鏗（Patrick）出身名門，味蕾同一般人係唔同啲，有「富豪飯堂」之稱嘅福臨門最得佢歡心。依家正值秋冬時節，佢哋嚴選食材炮製嘅時令小菜「冬筍炒山瑞絲」，最令Patrick回味無窮。
早前卓妮喺個活動度撞到Patrick，佢做東華主席時，曾被網友形容為最靚仔嘅東華主席，退任之後佢雖然少啲蒲頭，但一樣咁有型靚仔。Patrick口中嘅冬筍炒山瑞絲，由揀選食材到烹調都好講究，一碟例牌要成五百六十元。
山瑞與水魚同屬鰲類，但膠質比水魚更濃，含豐富黏多醣，一句講晒，係珍貴食材。福臨門選用梧州山瑞胸膛及裙邊部位，肉質細嫩鮮美，而且具有強力養陰補血嘅功效，係一道十分珍貴野味菜餚。
至於冬筍亦都唔簡單㗎！佢哋嚴選短身有肉嘅江西或者韶關冬筍，將冬筍切絲之後，再同山瑞絲一齊炒，就成為富豪都難抵誘惑嘅佳餚啦！
卓妮