手錶款式轉不停，功能更係千變萬化。論前衞，太陽能腕錶已過時嘞，取而代之係「光動能手錶」，鐘錶界老行尊孫秉樞率先戴住一隻縱橫Ball場。佢話單靠室內燈光或燭光都足以推動隻錶，唔使用電池，環保到極。
孫秉樞閱錶無數，家中珍藏名錶多如天上繁星，但佢笑言「做嗰行厭嗰行」，平日出街好少戴鑽石名錶。早前以東華前主席身份出席「Starlight」慈善晚宴，就揀咗隻由星辰出品嘅光動能手錶。
好多人都知道，孫秉樞係星辰錶香港代理，為該品牌做生招牌絕對正常。不過呢隻錶亦有過人賣點，係「90後」新科技，三年前由星辰錶廠研發出嚟。錶面有埋萬年曆，日曆顯示計特別闊大，保證唔會睇到眼矇矇。原來孫秉樞抗拒戴「薄錶」，話太斯文唔啱佢，呢款錶夠厚身，仲帶點粗豪味，正合心意。隻錶盛惠五千幾蚊，相比瑞士名錶，抵到爛。
卓妮