公、社兩黨議員嘅請辭，尋日正式生效，立法會工作效率即時提升，相信唔少議員會暗自叫好。好似尋日立法會雷曼聆訊上，雷曼小組主席何鍾泰宣布，因為社民連長毛嘅離開，小組成員由廿一個減到廿個，法定人數亦由七位變成六位。換言之，流會機會都低咗啦！
而平時無乜特別嘢傾都搞個幾鐘嘅內委會，曾經就全體議員定義引起小爭拗，但起碼無掟蕉、爆粗同拍枱走，半個鐘開完，準時三點交番個會議廳畀財委會，認真少有。財委會更加厲害，事關習慣拉布嘅社民連三子走咗，尋日一個鐘多啲就可以鬆人，比預計快咗一倍。
話時話，立法會為咗應付經常搞事嘅社民連三子，特登請多咗批年輕保安員睇場，家陣三個人都走咗，佢哋咪變咗無用武之地？