近來政壇亂事多，五區總辭可能隨時由於建制派嘅杯葛觸礁，而早前盛傳好大機會落港島參加補選嘅民建聯副主席張國鈞亦無咗躋身立法會嘅黃金機會。本以為張國鈞會好失落，點知佢尋日出席一個記者會時就容光煥發，一問之下先知佢下月七日小登科，搶閘成為二○一○年第一個結婚嘅政界人士。
張國鈞自爆話嚟緊會喺港島海逸君綽酒店擺三十幾圍大宴親朋，不過就強調唔係為咗刺激北角呢個民記票倉嘅經濟，而係諗住間酒店新開，可以畀多啲新鮮感賓客喎！但佢話太太請唔到假，蜜月旅行要拖到復活節假期先可以去。計一計數，即係四月頭張國鈞先會暫時離開香港一段時間；如果到時民記唔選又選，佢仲有時間預備補選。但今次唔參加補選都無緊要啦，新婚一生人一次，張國鈞一於疊埋心水享受新婚生活。