財務匯報局主席盧高靜芝（Sophia）幾時都咁優雅大方，加上經常將微笑掛在臉上，令人覺得好賞心悅目。問Sophia着衫嘅秘訣，佢話自己情迷歐洲牌子，近年就鍾意簡約輕便嘅Celine。Sophia仲鍾意喺季頭掃盡啲靚衫，費事冇晒佢啲尺碼，咁佢就安樂晒啦！
Sophia身兼婦女事務委員會主席，識扮靚又有腦，係唔少女士心中嘅典範。Sophia話佢以前返工時鍾意着Armani，但着咗咁多年都覺得悶，所以一退休就唔着啦！依家佢冇固定着咩牌子，最緊要啱眼緣。
卓妮撞到Sophia當日，佢着住Celine上一季嘅中袖外套同樽領毛衣，原本仲有條裙可以襯成一套，但佢近排扭親條腰，戴咗腰封着唔到條裙，所以索性自己配搭條黑色西褲喇。
Sophia笑住話，佢對腳長啲，要着大碼，如果等到季尾就冇晒佢啲尺碼，所以新裝一上市佢就買定啲衫，咁先至安樂。不過有時都唔記得着，好似嗰日着嘅樽領冷衫，直至嗰朝先至拆價錢牌㗎喳！
卓妮