「打針快啲好吖嘛！」

以上對白明顯過時，以下先至係最有時代感嘅潮流講法——

「醫生，唔打針得唔得？」

「打針可以預防豬流感吖嘛！」

「之但係，有個醫生打咗針，反而淪為病人，拮乜鬼嘢爸爸……綜合症喎，下肢乏力腳仔軟嗰隻，好得人驚啫！」

「係吉巴氏綜合症至真。既然係咁，好啦好啦，唔打針啦。講開又講，我自己都唔係幾敢打……」

自從豬流感疫苗被揭發出現副作用，你都咪話唔恐慌，愈來愈多人唔肯打針。上星期接種人數平均每日超過一萬，到咗呢個星期，慘情咯，昨日接種人數四千九百多啲，比上周一嘅一萬六千多人打針暴跌七成，金融海嘯都未試過拖累恒生指數跌得咁杰撻撻。

講咗咁耐，功夫茶其實想問一問執掌醫療衞生政策生死大權嘅官老爺，譬如食衞局局長周一嶽，究竟邊類人士應該注射豬流感疫苗？邊類人士又可免則免？大佬，真係嚇到心肝仔卜卜跳㗎，連身為專家嘅醫生都話打針中招，普羅市民鬼識咁多咩，全賴閣下提供救命訊息㗎咋。

喂喂喂，搞邊科呀？疫苗副作用都未講清楚，不適宜打針嘅高危一族又唔知係邊個，官老爺居然計劃將免費接種疫苗範圍擴大到包括小學生？唔好玩啦，咪以為家長係輕易相信茅山師傅有改運法力嘅無知少女，佢哋一見到醫生打針出現副作用，自己當堂嚇到腳仔軟，一定唔肯畀自己嘅心肝寶貝做白老鼠！

即係咁，等功夫茶問多次，究竟邊類人士應該注射豬流感疫苗？邊類人士又可免則免？如果你答得出小學生係唔會有事嘅，咁家長或者就會放心，如果你答唔出咯喎，接種疫苗計劃只會趕客。

兒童健康疫苗關注組召集人賴仁彪就講得啱嘞，佢質疑「冇人打針先叫學生打」，促請當局提供更多有關資訊，例如疫苗副作用詳情，以及吉巴氏綜合症嘅治療方法等等，挽回公眾信心，釋除家長疑慮。

道理其實就係咁簡單，資訊愈係唔清唔楚，恐慌只會愈來愈多，你模模糊糊吖嘛，小市民睬你都傻！

話時話，睇真啲特區政府一班醫療官老爺嘅言行舉止，確係有少少似茅山師傅，以呃神騙鬼口脗氹細路：小朋友小朋友，打針啦打針啦，打咗針就會改運㗎喇！

打針係咪會改運？不如聽聽專家見解，有一位主管歐盟衞生事務嘅德國籍流行病學專家沃達格，不但質疑所謂豬流感疫情大爆發係藥廠誇大其詞乘機牟利嘅「世紀醫學大醜聞」，佢仲批評，疫苗成效不佳，幾百萬健康嘅人毫無必要接種呢種測試不足嘅疫苗，一來浪費醫療資源，二來令到接種者陷於未知嘅後遺症危機。

唉，原來成個地球真係有可能變咗一個受騙嘅無知少女！