本身係威爾斯親王醫院外科醫生嘅騮哥即時呼冤，話唔打針純粹因為唔覺得自己係高危一族，又話流感疫苗係要年年都打嘅，如果要年年都走去畀人拮一針，好痛㗎嘛，所以自己之前都無打季節性流感疫苗。

騮哥當住周一鑊面講呢番話，擺明就係潑佢冷水，事關周一鑊嗰頭啱啱至講醫護人員打針唔止為咗保障自己，仲係要避免將病毒傳染畀病人。騮哥唔覺得自己係高危人士，唔知言下之意係咪做咗議員後，都好少返醫院睇病人呢？

唔認係高危人士嘅仲有立法會工程界代表何鍾泰，佢已屆「從心所欲之年」，都話唔打住，佢話季節性流感疫苗就一早打咗，但豬流感支針咁新，都係睇定啲先，仲話自己年齡雖然算高危人士，但身體狀態仲有排都未係喎。