港股近幾個月喺二萬至二萬二千點之間浮浮沉沉、冇嚟方向，煲呔曾早前仲忽然改口唱衰香港，話今年經濟有機會出現雙底衰退，令好多揸住成手貨嘅小股民不知如何是好。不過向來投資有道嘅保險界立法會議員陳健波，尋日與傳媒聚會時就話未驚過，仲睇好恒指會喺年內升至二萬六千點，相對尋日收市仲有一成六升幅。
波哥嘅投資往績一向都唔錯，最經典係年前滙豐宣布供股跌到得三十幾蚊、引發全城恐慌時，佢就臨危不亂力撐供股，仲喺低位先後撈咗幾次貨，如果大家當時有聽佢講，依家肯定執咗唔少。早前滙豐腳軟回落到八十蚊邊，連佢嘅「五散人」盟友會計界議員陳茂波，都請教佢係咪應該減持，當時波哥就叫佢唔使驚，結果冇耐滙豐就升番上九十蚊水平，證明佢真係幾有眼光。
波哥睇好滙豐可以喺一年半內重上一百二十蚊，連一手滙豐都唔夠錢買嘅，佢話可以考慮買盈富基金。不過講到尾大家都要衡量自己嘅承受風險能力，最後輸咗錢就唔好賴阿波哥喇！