早前懷疑畀女友斬傷搞到入廠嘅社民連成員季詩傑，尋日都有出席五區公投嘅記者會，驟眼睇嚟，着住粉紅色恤衫嘅佢精神唔錯，唔係見到佢面上貼住嘅膠布都醒唔起佢曾經經歷過咁淒涼嘅愛情災難。
大家都好想知阿季好番未，佢就話暫時只係得面上嘅傷口拆咗線，身上就仲有幾處傷口未好。阿季同我哋呻話依家連波都冇得踢，但就話自己嘅傷唔會影響佢參與五區公投，事關佢負責用腦，唔使點擔擔抬抬喎。
諗番事發當日，阿季話希望大家慢慢淡忘件事，唔好再提起。雖然阿季身上嘅傷差唔多好番，但佢個心有幾傷就真係冇人知喇。
另外，尋日同場都有一個稀客出現，嗰個就係預計會辭職嘅立法會議員梁家傑嘅太太陳淑儀嘞，梁太喺○七年已經幫過梁家傑競選特首，佢話今次出嚟純粹係因為自己好支持公投呢個活動，同老公將會辭職再參選並無關係喎。