本文重點
中華廠商聯合會近年銳意年輕化，扶植新一代上位，全國政協委員盧文端女婿吳永嘉（Jimmy）就啱啱新紮成為廠商會副會長。Jimmy份人好念舊，手上戴住嘅Piaget伯爵名錶，原來係外父送贈，隻錶全球限量只有一百五十隻，矜貴到極！
限量版伯爵全球150隻
Jimmy早前以政治事務委員會屬下「專業人士小組」召集人身份喺馬車會所設宴，邀請律師會會長王桂壎及稅務學會前會長龔永德分享珠三角發展機遇，前日仲跟廠商會大隊，參加一個慈善步行。講起戴錶心得，佢即時遞出右手展示伯爵名錶。卓妮一睇，果然係靚嘢。機芯超薄不在話下，設計簡潔高雅，錶身背面仲刻上「137/150」編號，即係一百五十隻限量錶入面嘅第一百三十七隻，身價不言而喻。
唔講唔知，隻錶原來係外父盧文端幾年前送贈。Jimmy話外父喜愛收藏手錶，矜貴之處係全球發行量寥寥可數，有錢都買唔到，Jimmy日日戴住返工，以示對外父尊重。
卓妮