北京凍成咁，有乜嘢影響？影響就大咯，累到財爺曾俊華冇得上京攞彩！

冇錯，鬍鬚曾本來係打算一月三日上京嘅，同中央政府財金官員會面咁話，當然少不免一個唔覺意會撞到國家領導人，話唔定阿爺會當面讚兩句，吖，叻仔喎，頂得住金融海嘯，香港經濟唔算得上多災多難，反而樓股暢旺，呎價仲以七萬蚊破埋世界紀錄添。可惜吖，天公不造美，攞彩先至嚟落雪，行程受到延誤。

曾俊華諗住順延一日啦，一月四日起程。點不知北京天氣冇改善，仍然橫風橫雪凍到抽筋，機場航班七國咁亂。

咁點好呢？冇辦法嘞，財爺訪京行程無奈取消，改由財經事務及庫務局，同埋金管局負責跟進。

曾俊華係咪上京攞彩，本來唔係咁重要，天有不測之風雲呢家嘢更加係見慣不怪。之不過當功夫茶諗深一層，發覺今次財爺去唔成北京，應該係好事而唔係壞事，因為可以畀佢多啲時間留喺香港，細心考慮下一份財政預算案應該點樣寫。你知啦，又掛住出門，又掛住攞彩，好容易心散㗎，倒不如閉門謝客，專心一致做功課。

如果你話鬍鬚曾真係叻仔，都冇咁令人擔心，弊就弊在呢個喺電視廣告裏面成隻「攝青鬼」嘅財政大掌櫃，睇怕同民意相當脫節，根本唔知道乜嘢叫做紓解民困。

呢嗱，香港有超過百萬窮人呢一筆都唔講住嘞，大家有冇留意到，最近有一批「八十後」嘅年輕人非常出位？反對起高鐵又見佢哋，操上羅湖橋又見佢哋，衝擊中聯辦又見佢哋，滿腔怒氣嘅嚴重程度比抬棺材嘅示威專家有過之而無不及。點解二、三十歲嘅年輕人咁好火？有人研究過，十年以來普遍市民入息中位數上升百分之九點四，唯獨係「八十後」落後大市，學歷雖然高咗，收入反而少咗，入息中位數跌咗一成，所以怨氣特別大。

對於「八十後」年輕一代嘅滿腹牢騷，你估曾俊華有乜睇法呢？佢喺自己個人網誌話喎，唔認同年輕一代欠缺向上流動嘅機會，只不過佢哋嘅期望比上一輩較高；以前香港人只要生活安穩，可以上樓住公屋就滿足，新一代關注嘅可能係私人樓宇住客會所有乜嘢設施、泳池有幾大、私隱有幾高。

唉，你話死火唔死火？你話係咪牛頭唔搭馬嘴？人哋講緊年輕人讀完書搵唔到食，鬍鬚曾居然變相怪責小朋友大想頭，潛台詞即係話，有公屋你住已經算係咁啦，唔好人心不足蛇吞象，又要住私樓，又要有泳池！

所以話啫，橫風橫雪阻上京應該係好事，畀曾俊華多啲時間留喺香港面壁思過，諗真啲點樣以民為本，唔好又寫一份劣評如潮嘅財政預算案獻世嘛！