人稱「女電王」嘅中電常務董事阮蘇少湄去年八月宣布患上早期乳癌，向中電申請休假養病，消息轟動一時。喺新一年嘅第一個工作天，女電王帶咗個好消息畀大家，就係經過多個月嘅治療後已經康復，嚟緊好快就可以返工，仲升職為中電嘅副主席添。啱啱好番就即刻工作，不改佢女強人嘅本色！
阮蘇少湄係中電百年嚟第一個女當家，以詞鋒銳利、做事果斷見稱。半年前女強人倒下，好彩佢用半年時間，戰勝病魔。不過可能中電都想錫住阮太嘅身子，唔想大病初愈嘅佢太操勞，所以嚟緊阮太都只會以兼職嘅形式出任中電副主席一職，集中策劃中電喺香港業務嘅發展策略，而佢亦都會繼續留任香港核電投資有限公司主席一職。至於常務董事個位呢，就會交由喺上年八月開始頂替阮太擔任署理常務董事嘅藍凌治正式坐正。