立法會議員葉劉淑儀牽頭嘅匯賢智庫，尋日喺北角開咗新嘅社區服務中心。福建幫頭領、福建社團聯會永遠名譽會長盧文端，同埋聯會主席林樹哲兩名猛人都有捧場。北角素來係福建幫地盤，今次葉劉得猛人力撐，唔通得米？
本身係民建聯監委會副主席嘅盧文端咁畀面撐葉劉，原來係因為當年葉劉做工業署長時，盧文端係中華廠商聯合會嘅副會長，兩人因而認識，十幾年老朋友，盧文端話梗係畀面撐場啦！佢仲開埋金口話，如果葉劉有咩需要幫手，只須出句聲就得。難怪葉劉即刻用福建話講番句「多謝」以示感激。盧文端笑笑口，謙稱佢根本無票。
匯賢智庫喺西灣河嘅服務中心租約期滿後，葉劉就決定搬嚟更就腳嘅北角，七百幾呎地方，月租要萬七蚊一個月。同場有前年排喺葉劉名單參選嘅史泰祖，對於五區總辭佢有冇興趣參選，佢就話自己嘅勝算唔大，都係做番醫生好啲。